Komið þið heil og sæl!

Langt er nú síðan ég hef pikkað eitthvað hérna og mig langar að setja hér inn smávegis um árið sem er að líða.

Þetta var fínasta ár, svona heilt yfir litið.

Börnin hafa vaxið og dafnað, eins og gefur að skilja. Jóhanna var sein í því að fara að ganga en í júlí kom þetta loksins hjá henni og nú er hún farin að hlaupa. Hún er farin að tala heilan helling, endurtekur sífellt heilu setningarnar eftir foreldrunum og tjáir sig mjög ákveðið um hvað hún vill og hvað hún vill ekki. Hún er mjög ákveðin ung stúlka og henni líkar vel á leikskólanum. Davíð Ingi hefur tekið út heilmikinn þroska, hann er í elstu deild leikskólans núna og er að læra um allt milli himins og jarðar (þemað hjá þeim í haust var himingeimurinn) auk þess sem hann er farinn að lesa svolítið (stauta sig í gegnum texta) og skrifa. Hann er mikið gefinn fyrir það að leysa hinar ýmsu þrautir tengdar skrift og reikningi, sjónvarpsgláp og tölvuleiki, en minna gefinn fyrir það að leika sér að dótinu sínu. Nú í haust byrjaði hann svo að æfa fótbolta með Þór og líkar mjög vel. Þeim Jóhönnu kemur yfirleitt mjög vel saman og eru almennt afar góð við hvort annað, taka til dæmis svona knús- og klappstundir þar sem þau láta vel að hvort öðru.

Mér hefur gengið vel í vinnunni en enn er alltof mikið að gera þó ég sé "bara" í 100% kennslu núna. Margt spennandi er að gerast í MA tengt nýrri námskrá og námsskipulagi sem verið er að vinna að á fullu núna í vetur með það fyrir augum að byrja á nýju fyrirkomulagi næsta haust á fyrsta ári. Við í enskudeild vorum líka svo lánsöm að fá aftur til okkar þær Árnýju og Hörpu sem fóru í námsorlof síðasta vetur, sem gerir góða deild enn betri! Í haust kom líka mjög greinilega í ljós hversu samheldið skólasamfélagið okkar er þegar erfiðleikar steðja að; í raun erum við nánast eins og ein stór "fjölskylda," og það er einn af stóru kostunum við það að vinna í MA.

Ég er líka ánægð með að vera byrjuð að grúska aftur og er á kafi í rannsóknarverkefni tengdu Tudor tímabilinu og sögulegum skáldsögum. Það gengur hægt vegna mikilla anna í vinnunni en ég stefni samt á að halda fyrirlestur um efnið hjá Akureyrarakademíunni í febrúar.

Sumarið var gott með tilheyrandi ferðalögum og sumarbústaðadvöl og ég fór í góða ferð til London að heimsækja Jóhönnu vinkonu mína og fjölskyldu hennar. Ég vildi bara óska að ég gæti farið oftar í svoleiðis ferðir, það er, að heimsækja gamla og góða vini sem maður sér alltof sjaldan og er of lítið í sambandi við.

Og nú, gott fólk, man ég bara ekki meira til að skrifa um. Þetta segir mér að árið 2009 hafi ekki verið mjög viðburðaríkt hjá mér. Þegar ég lít til baka man ég ósköp fátt sem er þess virði að rifja upp hér. Þetta var stormasamt ár fyrir þjóðina en greinilega ekki svo dramatískt hjá mér. Það er kannski rétt sem þeir segja að "no news is good news", en svona til að slá botninn í þetta kemur hér úrval af status öppdeitum af Facebook til að birta árið í hnotskurn:

• wishes everyone a very Happy New Year! (1. jan)
• keypti sér flottan samkvæmiskjól í dag (2. jan)
• is working too late (4. jan)
• exclaims with exasperation: why can so few write a decent essay? (5. jan)
• semur próf, próf, próf (6. jan)
• "In 15 days: 854 Palestinians were murdered (236 children and 100 women) and 3680 were injured". Donate your status: http://apps.facebook.com/supportgaza/ (11. jan)
• var að útbúa kræsingar fyrir þann sem er svo heppinn að sitja yfir prófinu mínu í fyrramálið... (11. jan)
• - as we speak my students are walking on hot coals, metaphorically speaking (12. jan)
• hvetur alla til að gerast vinir Árneshrepps, afskekktustu sveitar á landinu (15. jan)
• is going to a singing class tonight - and to celebrate her mum's birthday plus Obama's inauguration (20. jan)
• er í leit að réttlætinu... (21. jan)
• - JEI! Loksins búin með þetta! Verð að skella mér í heitan pott... (22. jan)
• er að fara í partý í kvöld. Prófastressið búið, jibbíjei (23. jan)
• ætlar að reyna að forðast kökur og kruðerí á næstunni - prófakaffið fór alveg með'etta! (29. jan)
• er orðin langeygð eftir þessari blessuðu nýju "ríkisstjórn" (30. jan)
• likes her friend Mandy McLeod's song "Tomorrow knows". Check it out on http://profile.myspace.com/mandymcleod (4. feb)
• er heima með lasinn strákpjakk og bakar brauð í hjáverkum (5. feb)
• var að bóka húsmæðraorlof í höfuðborginni - Búaball, here I come! (15. feb)
• is dreaming of going abroad in the summer... well, dream on (17. feb)
• is preparing mentally for singing tonight - destination: Scotland (19. feb)
• telur niður í húsmæðraorlof (4. mars)
• er að hlusta á skoskan höfund tala um bókina sína... falleg skoskan (16. mars)
• vonar að þetta sé ekki bara platvor... (23. mars)
• langar í eitthvað djúsí að borða í veikindunum, en fær sér bara fiskisúpu með fullt af engiferi (25. mars)
• is being laughed at by her husband (28. mars)
• thinks Margaret Atwood is one of the greatest writers of fiction today (29. mars)
• stress, stress, stress... (30. mars)
• er að fara að hlusta á brjálæðislega áhugaverða fyrirlestra nemenda í fjölmiðlaensku (1. apr)
• ekkert jafnast á við góðan sundsprett, ojá (3. apr)
• Sjaldan hlýtur hikandi happ (málsháttur þessi var í egginu sem ég fékk í vinnunni) (3. apr)
• er með Maríu Stúart á heilanum / is obsessed with Mary Stuart, Queen of Scots (5. apr)
• saumar gluggatjöld og hlustar á sænskt þjóðlagapopp - life is good, man! (8. apr)
• er í góðum gír heima hjá tengdó - og búin að fara í Sundhöll Selfoss með familíuna... (10. apr)
• is in a room full of chatterboxes.. ahh, too big a class! (15. apr)
• nennir varla að vinna á sunnudagskvöldi, væri miklu frekar til í að glápa á mynd (19. apr)
• celebrating our fifth anniversary with roast chicken and apple pie (23. apr)
• woooooohoooooooo! (24. apr)
• is glad that the elections are over and that the leftist parties plus the Citizens' Movement are the winners! (26. apr)
• Lo and behold! The sun came out as I was swimming the last metres. Spring is hopefully here. (30. apr)
• Helgarfrí, hopp og hí. (30. apr)
• vonar að nú fari heilsan að lagast hjá dótturinni - þriðja eyrnabólgan á 4 vikum og lungnabólga í þokkabót! (3. maí)
• is marking, correcting, marking and shaking her head but is soon getting to the bottom of the pile... (4. maí)
• is dreaming of the bonnie banks of Loch Lomond... (5. maí)
• is working, and working, and working. In fact, I've been working every night for a week or so. I could do with a break. (15. maí)
• vinna um vinnu frá vinnu til vinnu... en svo eru það Strandirnar bráðum, sko. (17. maí)
• Nú bíður kennslukonan eftir dimmiterandi útskriftarnemum (þar á meðal sæðisfrumum) í heimsókn, og svo verður keyrt á Strandirnar. (20. maí)
• er komin úr skemmtilegri ferð á Strandirnar. Litlu lömbin voru svo dæd og dæd og dæd og Davíð Ingi var úti allan daginn og Jóhanna hló og lék á alls oddi og var svo ljúf við afa og ömmu... (25. maí)
• próf, próf, grill grill ;-) (26. maí)
• fór með litlu Jóhönnu í rör og grenjaði þegar hún sá barnið sitt á kæruleysislyfjum. (28. maí)
• er grasekkja um helgina en það er allt í lagi því veðrið er gott. (30. maí)
• er búin að fara í Kjarnaskóg og á Bautann með ormana og bíður nú spennt heimkomu eiginmannsins úr júbíleringar-suður-ferð. (1. júní)
• borðaði yfir sig í prófakaffi þar sem borðið svignaði undan kræsingum sem myndu sóma sér vel í fermingarveislu. (2. júní)
• próf, próf, próf, fiskibollur, flatkökur og hangikjöt... (5. júní)
• Mikið vakna þessir krakkaormar snemma.... (7. júní)
• is finally about to finish the exams and then it's just clean-up and report time - holidays are approaching :-) (9. júní)
• chillin' in da south... (12. júní)
• fór í útskrift í morgun, niður í bæ með soninn eftir hádegið og á stúdentahátíð í Höllinni í kvöld. Nóg að gera! (18. júní)
• what happiness not to have to work every night; what happiness to have time for trivial things; what happiness to watch another episode of The Tudors instead of teaching prep or marking... (18. júní)
• you better tidy up the desk, honey! (22. júní)
• tekur til, bakar, þvær þvott og bíður eftir hjónunum á Steinstúni. (24. júní)
• Þá er það að búa til kartöflusalat og undirbúa hina "löngu" ferð á ættarmótið inni í Svarfaðardal! (26. júní)
• kom heim með lasna snúllu í gærmorgun, ekki varð mikið úr ættarmóti og útiveru hjá okkur mæðgum... (28. júní)
• er með Hinrik áttunda og hans slekti á heilanum. (28. júní)
• veltir vöngum yfir því hvernig eigi að snúa sig útúr þessu búningaþemapartíi. Einhverjar hugmyndir að búningi sem hægt er að búa til sjálfur? (1. júlí)
• elskar sumarið og er á leið þangað út eftir tíu. (2. júlí)
• loves the warm weather - it's so unusual, almost like being abroad! (7. júlí)
• stuttklippt með krullur og baka heilhveitibrauð... (7. júlí)
• cooked a wonderful dinner for two wonderful people who've come all the way from Scotland and always ask for a fish pie. (10. júlí)
• loves the smell of rhubarb in the house - rhubarb jam in the making! (13. júlí)
• listens to Capercaillie. It is a band, but also a bird. Well, look it up. (15. júlí)
• should maybe go fishing with her son today.... (18. júlí)
• skemmti sér hrikalega vel í gyðjupartíi. Með bestu partíum ever! (20. júlí)
• Gyðjan mín er skáldgyðja, sönggyðja og matargerðargyðja... (21. júlí)
• er búin að fá nóg af rigningunni á Ströndum. (30. júlí)
• restaurants, shops, books, Kensington, Notting Hill... (4. ágúst)
• er nýkomin úr rúmlega þriggja vikna ferð, með viðkomu á Ströndum, Flóanum, London og í lúxus-sumarbústað rétt hjá Flúðum, þar sem voru endalausar matarveislur og meðal annars grillað hrefnukjöt á matseðlinum. Yndislegt sumar! (17. ágúst)
• mig langar að sitja á mjúkri þúfu í fjallinu fyrir ofan Steinstún að tína ber í dollu... (23. ágúst)
• er berjablá og aum í bakinu (25. ágúst)
• er á leið út í sólskinið að sækja börnin sín fallegu. (2. sept)
• fór á góða kynningu um PMT og SMT á leikskóla krakkanna í morgun, klárlega tækni sem ég þarf að tileinka mér í meiri mæli. Og nú er hið daglega brauð í ofninum :-) (3. sept)
• Menu of the day: LUNCH - Leek and red pepper flan with fresh salad, bread and red pesto + for desert a chocolate cake with a hint of orange lined with berries and served with cream. DINNER: pasta with chicken, olives and vegetables in red pesto sauce and garlic bread + for desert fresh berries. What a day. (8. sept)
• sólin skín á þessum fallega degi og sumarið virðist komið aftur, fjölskyldan ætlar út í góða veðrið og kíkja svo á Minjasafnið, þar er sýning um leikföng. Eigið góðan dag kæru vinir :-) (12. sept)
• is feeling homesick. That is, for home home, where I grew up. (15. sept)
• Absolutely, entirely, fundamentally and inspiringly marvellous! (24. sept)
• á son sem er ungur og ástfanginn ;-) (27. sept)
• Pizza (from freezer) and rice porridge for Friday dinner. After kids' bedtime, crawl under a blanket and read a good book. Bliss. (2. okt)
• Góður dagur í dag: sól og snjór á Akureyri og ég ætla í Gravity eftir vinnu. (5. okt)
• skar rollu í kvöld. Dagsverki lokið, nú er að glugga aðeins í kennslubækurnar fyrir morgundaginn. Geisp. (8. okt)
• hélt ekki að hún ætti eftir að sjá þessa hljómsveit live - en í gærkvöldi fór ég á frábæra tónleika með Þursaflokknum. Algjör snilld! (11. okt)
• skellir glossinu á og fer að kenna. (12. okt)
• Strandakjötið komið í hús (og frysti) og því tilvalið að hafa kjöt og kjötsúpu í kvöldmatinn. Namm! (12. okt)
• endurnýjaði kynnin við Michael Jackson með því að skella gömlu LP plötunni Thriller á - og börnin eru líka að fíla þetta í botn :-) (14. okt)
• Er heima með systkinin; Davíð Ingi veikur en Jóhanna loksins hitalaus. (16. okt)
• Rauðvín og kertaljós, krakkarnir komnir í ró, marokkóskar kjötbollur með kúskús á leið á borðið, en hvað það er gott að geta borðað einu sinni í ró og næði með eiginmanninum. (16. okt)
• á dóttur sem finnst gaman að vera í kjól og með tíkó :-) (25. okt)
• Off to bed I go, far too late I know, tomorrow yet another day of keeping tiredness at bay... (28. okt)
• átti góða daga í yndislegu veðri á Ströndum. (3. nóv)
• A short week at work has come to an end and I'm grateful for: singing a song with my little daughter last night and receiving so many kisses and cuddles while doing so; being able to see my parents and spend time with them; having such wonderful, supportive colleagues; meeting all these wonderful young people while tea...ching. There are so many other things to be grateful for - have a good weekend my Facebook friends! (6. nóv)
• goes for a walk downtown in the cold, crisp air. A beautiful day in Akureyri, and life is good! (12. nóv)
• er að komast í partífíling... (12. nóv)
• er sorgmædd (20. nóv)
• undirbýr piparkökugerð með börnunum: deigið tilbúið og komið í kæli. (21. nóv)
• afgreiddi málin eftir vinnu í dag og keypti restina af jólafötunum á börnin. Þá er það allavega búið :-) (25. nóv)
• Ég las vitur orð frá níræðri konu í Bandaríkjunum áðan sem var gott að sjá í lok viku sem hefur alls ekki verið auðveld. Hér eru nokkur sem er mikilvægt að hafa alltaf í huga: 1. Lífið er ekki sanngjarnt, en það er samt ljúft. 2. Börnin þín fá bara eina barnæsku. 3. Vinnan þín mun ekki sjá um þig þegar þú verður veik(u...r). Vinir þínir og fjölskylda munu gera það. Vertu því í sambandi við þau. (27. nóv)
• kveikir á kertum eftir erfiðan dag þar sem góður félagi var kvaddur hinstu kveðju / lights candles after a difficult day of saying farewell to a dear colleague. (30. nóv)
• Songs to celebrate the festive season in the soothing voice of Loreena McKennitt, marking tests and assignments, feeling ever so sleepy, whiteness outside... (1. des)
• Kósí heima, Már á jólahlaðborði Amtsbókasafnsins, börnin sofnuð og Andrea Boccelli að syngja jólalög, nice! (5. des)
• Góður dagur með börnunum, fótbolti, leikvöllur, og skautar (eða þannig sko, svellin eru allsvakaleg hérna); á meðan svaf þunnur eiginmaður á sínu græna eyra. (6. des)
• á sniðugan leynivin sem finnur upp óleysanlegar gátur... (7. des)
• átti frábæran leynivin sem var á lista yfir grunaða en ekki ofarlega, svo þetta kom mér pínu á óvart (en eiginlega ekkert samt). (11. des)
• Súkkusukk eru óhollar smákökur, en ein nægir til að halda manni vakandi við kennsluundirbúning og fleira aðkallandi... (13. des)
• tókst að pakka inn einni jólagjöf og ganga frá einu korti í kvöld, svona á meðan ég hvíldi mig á því að fara yfir verkefni og próf. Er þetta heilbrigt? (15. des)
• jólafrí, jibbíjei, hopp og hí og tralala (18. des)
• vakir ekki lengur (í bili) yfir vinnunni en í staðinn yfir því sem er mikið skemmtilegra: að pakka inn jólagjöfum til barnanna og hlusta á fallega jólatónlist :-) (22. des)
• og þá er bóndinn afgreiddur. Það var ekkert smámál ;-) (22. des)

Það var nú hægt að misskilja þetta síðasta, en að sjálfsögðu var ég bara að tala um jólagjöfina.

Að tína til alla þessa öppdeita tók sinn tíma og nú sé ég svart á hvítu hvað ég hef eytt miklum tíma á Facebook þetta árið (og eru þetta þó ekki nærri því allir statusarnir...). Við þá sem nenntu að lesa þetta allt segi ég bara: vel af sér vikið! Þið hin: ég skil það alveg.

Að lokum er hér linkur á myndir sem ég birti á Facebook af börnunum (og mér á nokkrum myndum), sem teknar voru hjá ljósmyndara í lok nóvember. Njótið vel:

http://www.facebook.com/album.php?aid=140180&id=657086880&l=9aac264927

Ég óska ykkur öllum gleðilegs nýs árs og þakka fyrir það gamla.

Kær kveðja,

Ingibjörg

Það eru ekki ýkja mörg ár síðan þau Lingonberry og Vittula hittust í netheimum. Þau komust þó að því áður en langt um leið að þau þekktust frá því þegar þau voru ung og vitlaus að byrja háskólanám í Reykjavík. Hann var nett hissa á því hvað hafði nú ræst úr þessari djammglöðu stelpu frá því í denn. Henni fannst hann jafn sætur og hann var þegar þau höfðu skrölt eitt kvöldið eftir enskupartí saman á klúbba. En hann hafði ekki tekið eftir því þá hvað hún var skotin í honum.

Nú eru þau gift og eiga tvö börn, og hann verður fertugur á morgun. Í tilefni af því fóru þau á hótel í gær og skildu börnin eftir með Sillu sem gisti hjá þeim. Þetta var velheppnað kvöld í alla staði. Mojito-inn á barnum á KEA bragðaðist undurvel. Hann var ánægður að sjá að þeir á KEA gera ölgerð af Suðurlandi hátt undir höfði. Svo var rölt á Rub23 þar sem þríréttaður kvöldverður var snæddur. Humarinn bráðnaði sem smjör uppi í verðandi afmælisbarni (og hann umlaði af vellíðan), og salatið með kjúklingnum kitlaði bragðlaukana hennar. Smálúða með arabísku Rub vakti hrifningu hans á meðan henni fannst plattinn með 14 vel völdum sushibitum sannkölluð dásemd. Eins og svo oft áður langaði þeim oftar en einu sinni í sama réttinn af matseðlinum og luku þessari yndislegu máltíð með því að fá sér bæði þrjár tegundir af ís og sorbet, sem bragðaðist unaðslega líka. Með máltíðinni var drukkið hvítvín sem rann ljúflega niður. Þau voru sammála um að Rub23 væri líklega besti veitingastaðurinn á Akureyri, enda höfðu þau farið þangað áður og verið afar hrifin. Eftir matinn var farið aftur á barinn á KEA og svo á pöbbarölt, en þó var bara eitt kaffihús heimsótt að lokum, Kaffi Amour. Uppi voru miklar pælingar um að fara út að dansa en þar sem þessi hjón eru bæði bráðum fertug varð ekki úr því.

Þau komu aftur heim á hádegi í dag, ánægð með þetta skemmtilega en stutta frí frá amstri hversdagsleikans.

Jæja, loksins kem ég aftur með seinni hluta frásagnarinnar af sumarfríinu. Ég er aldrei up to date með neitt hérna, alltaf að segja einhverjar gamlar fréttir. En hvað með það, ég var að lesa gömul blogg frá 2006 í morgun og hugsaði með mér að ég ætti að fara að blogga meira - það er svo gaman að lesa þetta þegar einhver tími er liðinn, svo margt sem rifjast upp sem annars væri gleymt, alveg tilvalinn efniviður í sjálfsævisöguna (þ.e. ef ég ætlaði mér einhverntímann að skrifa svoleiðis, sem ég ætla ekki) og örugglega skemmtilegt fyrir börnin og barnabörnin að lesa seinna meir. Allavegana, ég ætti að blogga meira, that's the bottom line. Hætta þessu Facebook hangsi og blogga reglulega - það væri pottþétt tímasparnaður .

Þá heldur ferðasagan áfram.

Að lokinni yndislegri Londonferð flaug ég heim til Íslands aftur, með hálffullan bakpoka af bókum sem ég keypti í Waterstones og "second-hand" bókabúð í Kensington, og slatta af fötum á mig og börnin úr H&M og Marks&Spencer´s. Ó hversu mjög ég elska Marks&Spencer's! Ég vildi að ein svoleiðis risastór búð, með matvörubúð og öllu, væri til á Akureyri. Og kannski eitt stykki Boots, og Waterstones, og .... Þá væri líf mitt fullkomnað, eða allavega næstum því.

Iceland Express gladdi mig með 4 tíma töf á fluginu, þannig að ég lenti ekki á Íslandi fyrr en um hálf 2 eftir miðnætti. Ég hafði varla rænu á að versla í fríhöfninni, svo vönkuð var ég eftir að sofa eins og grjót alla leiðina heim.

Börnin voru glöð og hissa að sjá mig í morgunsárið. Ég dröslaðist svefnvana á fætur með þeim; húsmæðraorlofinu lokið, en það var bara fínt.

Kvöldið eftir komuna heim var haldið heljarinnar partí í Miklholtshelli, þar sem öll systkinin voru samankomin. Eiki bróðir Más, sem býr í Svíþjóð, var heima með syni sína tvo. Það var grillað og borðað, spjallað, hlegið og borðað meira. Hér eru nokkrar myndir úr þeirri heljar veislu.


Jónína systir Más og Jóhanna, sem er afar glöð þarna því að hún er að gúffa í sig uppáhaldinu sínu, ís.


Eiki og Margrét.


Már og Jónína brosa sætt framan í myndavélina. Auðvitað voru allir að drekka bjór úr Ölvisholti .


Hér eru öll systkinin með Guðrúnu tengdamömmu. Þetta er fríður og föngulegur hópur eins og sjá má.

-----------------------------------------------------------------------------------------------

Nú leið að fimm ára afmælisdegi Davíðs Inga. Þegar ég var búin að jafna mig smá á flugi og svefnleysi fór ég að baka fyrir veisluna sem skyldi haldin á afmælisdaginn hans. Systur Más buðust til að koma með góðgæti með sér til að bæta við kökurnar sem ég bakaði, og svo fékk ég ómetanlega hjálp hjá minni elskulegu tengdamóður, en veislan var náttúrlega haldin heima hjá henni. Öllum systkinum Más og börnum var boðið, og svo buðum við líka bræðrum mínum á suðvesturhorninu, og komu Gísli og Arnar ásamt fjölskyldum. Þetta var í fyrsta skipti sem var haldin afmælisveisla fyrir frændur og frænkur, og það mættu eitthvað um þrjátíu manns. Afmælisbarnið var að vonum spennt og skemmti sér hið besta. Hér fylgja nokkrar myndir frá herlegheitunum:


Glaður fimm ára pjakkur opnar pakka að morgni afmælisdagsins.


Búinn að dressa sig upp fyrir veisluna. Takið eftir hálsmeninu - í H&M í London fann ég glingur fyrir stráka, þar á meðal þessa hálsfesti með mynd af Leiftri McQueen úr Cars myndinni, og armband líka. Guttinn minn var mjög ánægður með þessa hluti, sem fylgdu í afmælispakkanum frá okkur.


Jóhanna í veislukjólnum.


Davíð Ingi við veisluborðið.


Blásið á kertin fimm. Og takið eftir: þessir pizzusnúðar sem eru hér í forgrunni voru bakaðir af Gunnhildi frænku Davíðs Inga, og voru pottþétt vinsælasta veislubrauðið.


Davíð Ingi og Selma Margrét gæða sér á afmæliskræsingunum.


Arnar og Ágúst Freyr voru hinir kátustu.


Um kvöldið fékk Davíð Ingi, ásamt sonum Eika frænda hans, að fara á bak á þessum hesti, sem er kominn nokkuð til ára sinna og tók látunum í peyjunum með mestu ró.

-----------------------------------------------------------------------------------------------

Það sem eftir var dvalar í Miklholtshelli var ýmislegt brallað. Davíð Ingi stundaði heyskap með Gumma frænda, hjálpaði til að flokka eggin úti í hænsnahúsi, hjálpaði Tryggva að stússast í hinu og þessu úti hjá hestunum og í gamla fjósinu, og fleira. Jóhanna skottaðist um og sullaði í pollum meðal annars, og svo framvegis. Annars voru rólegheitin allsráðandi og við fórum ekki mikið, nema í einn bíltúr að Skógum, þar sem fékkst ekki einu sinni ís - meira um það hér neðan í myndakaflanum.


Einn röskur að safna heyi í hjólbörur fyrir Gumma frænda.


Jóhönnu fannst gaman að sullast í drullunni og pollunum.


Lítil spegilmynd.


Inni í garðskálanum hennar ömmu. Gaman gaman.


Þessi mynd er fyrir ykkur að ráða í. Gummi stendur fyrir utan gluggann, en það eru fleiri á þessari mynd. Hver eða hverjir eru það, og hvar eru þeir?


Litla snúlludúllan mín.


Og litli glókollurinn minn. Hann var að mála með Tryggva og fékk smá slettur á jakkann sinn.


Fjölskyldan (að myndasmiðnum undanskildum) við Skógafoss.


Þar sem við fundum ekki kaffihús við hæfi á Skógum keyrðum við til baka og fórum á þetta kaffihús undir Eyjafjöllum sem er í gömlu fjósi, mjög sætt og kósí, þó svo að kakóið hefði mátt vera betra og rjóminn með vöfflunum hefði mátt vera ekta....

-----------------------------------------------------------------------------------------------

Síðustu fjóra daga dvalarinnar fyrir sunnan vorum við í sumarbústað með vinafólki okkar, Atla, Nönnu og dætrum þeirra tveimur, Maríu (6 ára) og Emilíu (tæplega 4 ára). Við vorum í sumarbústað í eigu KÍ í Heiðarbyggð, rétt hjá Flúðum. Og nú segi ég við alla kennara sem lesa þetta: ég mæli tvímælalaust með þessum sumarbústöðum. Þeir eru algert æði! Húsið sem við vorum í var næstum glænýtt, tekið í notkun í september í fyrra. Í því (og öllum bústöðum KÍ þarna) eru fjögur svefnherbergi, og þarna var líka ýmiskonar lúxus: uppþvottavél og þvottavél, heimabíó, og svakalega þægileg rúm (ég svaf rosalega vel í þessu húsi, þá aðallega vegna þess hve rúmið var gott, held ég). Að auki er stór pallur, heitur pottur og gasgrill. Þetta var semsagt sannkallaður lúxusbústaður, og staðsetningin á húsinu sem við vorum í var algerlega meiriháttar. Út um stofugluggann blasti við málverk, svo flott var útsýnið.

Dvölin í Heiðarbyggð var dásamleg. Það var gott að vera með góðum vinum; við borðuðum saman veislumat alla daga, börnin undu sér við leik úti mestallan daginn, fóru í pottinn (sem var samt eitthvað að stríða okkur með hitastig og fleira), og fengu svo kósíkvöld eftir kvöldmatinn þar sem þau sátu undir teppi með ís að horfa á DVD mynd. Ferskt grænmeti var keypt á Flúðum og borðað með matnum, nammi namm. Það var ýmislegt á matseðlinum; grillaður kjúklingur, grillað hrefnukjöt, grillaðir bananar með súkkulaði, ís, grillað grænmeti á teini, salat, tómatar með ólífuolíu og basiliku, salat að hætti Atla (sem kenndi Má að búa það til) kartöflusalat úr nýuppteknum kartöflum með gráðaosti, omeletta, skyr, harðfiskur, flatkökur, súkkulaðikaka.... Farið var í ferð upp í Þjórsárdal og svo fórum við fjölskyldan rúnt í Reykholt í Biskupstungum þar sem ég hitti gamla vinkonu og skólasystur, Guðbjörgu, á bændamarkaði og spjallaði við hana dágóða stund. Við höfðum örugglega ekki hist í svona 14 ár eða síðan 1995 þegar við fórum saman á Reykholtsmót, og mikið vatn runnið til sjávar síðan þá, o já. Á leiðinni til baka komum við svo við hjá Gullfossi.

En hér koma myndir frá þessum góðu dögum:


Davíð Ingi og María, en þrátt fyrir að það hafi verið mjög gaman hjá þeim eru þau ekki sérstaklega glaðleg á þessari mynd.


Frú Ingibjörg var Grill-Meister eitt kvöldið og grillaði gómsætan kjúkling sem hún flatti út og kryddaði með töfrakryddi úr krukku sem fékkst dýrum dómum í kjörbúðinni á Flúðum. Að auki voru Flúðasveppir og Flúðakúrbítar ásamt fleira grænmeti skorið í bita og þrætt á pinna, penslað með ólífuolíu sem kostaði svona 2000 kall lítirinn hið minnsta í okurbúðinni á Flúðum, og grillað með kjúklingnum. Þessi máltíð var afar gómsæt, þó ég segi sjálf frá!


Í ferðinni inn í Þjórsárdal var stoppað góða stund og snæddur hádegisverður á árbakka einum. Hér eru María og Davíð Ingi að vaða í ánni, og Hekla blessunin í baksýn.


Nestið snætt. Frá vinstri: Emilía (að huga að kókómjólkinni sinni), Nanna, María og Davíð Ingi.


Við fórum líka að Þjóðveldisbænum, sem er eftirlíking bæjarins að Stöng, sem fór í eyði árið 1104 eftir mikið öskugos í Heklu. Hér eru þrír litlir glókollar við kirkjuna sem er við hliðina á bænum.


Við fórum að Hjálparfossi, sem er fallegur foss sem fellur á milli svipmikilla stuðlabergsmyndana, og hér er Jóhanna á þúfu þar rétt hjá.


Við mæðgur með Hjálparfoss í baksýn. Fyrir aftan til vinstri sést glitta í Má, Atla og eldri krakkana, sem fóru að kanna hellisskúta rétt við fossinn.


Nanna og Emilía.


Fallega Ísland.


Við keyrðum líka að rústunum á Stöng, en vegurinn þangað var ekki til að hrópa húrra fyrir og má segja að hann sé ekki skárri - og sennilega verri - en verstu kaflarnir á veginum norður í Árneshrepp. En hér eru krakkarnir að tína ber einhversstaðar rétt hjá Stangarbænum. Vitið þið hver Gaukur á Stöng var? Gúgglið það.


Þessi mynd er tekin við sumarbústaðinn. Jóhanna hafði gaman af að velta sér upp úr grasinu.


Kósíkvöld par excellens. Þau voru svo sæt, alveg eins og lítil hjón .


Davíð Ingi við Gullfoss.


Ein af nokkrum ferðum í pottinn. Hér eru allir að segja SÍS! nema einn. Getiði nú hver það er.


Enn eitt kósíkvöldið. Það var sko borðaður mikill ís á meðan á þessari sumarbústaðadvöl stóð!

Þá endar ferðasagan. Á sunnudagsmorgninum var bústaðurinn þrifinn (sem var það eina leiðinlega við dvölina þar) og Atli og Nanna ásamt dætrum brunuðu til Reykjavíkur. Við fórum til tengdamömmu í Flóanum og borðuðum hádegismat, og keyrðum svo til Akureyrar. Hinu formlega fríi fjölskyldunnar var lokið, þar sem Davíð Ingi átti að byrja á leikskóla daginn eftir og Jóhanna í aðlögun á sama stað. Það gekk allt vel og nú er allt komið í gömlu rútínuna á ný. Það er bara gott, en ég vildi samt óska að sumarið hefði ekki verið svona fljótt að líða. Þannig er þetta alltaf; maður veit ekki af fyrr en það er búið.

Læt ég þessu langa - og vonandi skemmtilega fyrir ykkur, lesendur góðir - myndabloggi lokið og býð góða nótt. Vonandi heyrið þið fljótlega frá mér aftur hér, en nú er allt að fara á fullt í vinnunni og því ekki víst hvernig það verður.

Bæó!
Ingibjörg "ofurbloggari"

Sælinú.

Það er allt í góðum gír hér á Akureyri. Öll fjölskyldan er nú komin í sumarfrí og við erum eitthvað að dúllast þessa dagana, förum líklegast bráðum eitthvað af stað vestur á leið, en ekki er alveg ákveðið enn hvenær.

Ég fór í geggjað gyðjupartí á laugardagskvöldið þrátt fyrir að Jóhanna væri nýbyrjuð að æla (systkinin voru með ælupest um helgina), enda sá pabbi hennar um börnin. Og ég hef sjaldan skemmt mér svona vel - þetta var klárlega besta partí sem ég hef farið í lengi. Þetta var partí með búningaþema og voru gyðjurnar í allskyns flottum göllum. Því miður var ég svo vitlaus að gleyma myndavélinni heima svo að ég tók engar myndir nema á símann minn (slæm myndgæði). Sjálf var ég með grímu en ekki í búning ég fann engan sem mér líkaði, og var of löt til að nenna að sauma eitthvað á mig (those were the days...).

Nú er þynnkan að baki (eins gott að maður fer ekki oft að skemmta sér) og ég sit við tölvuna á meðan Már skrapp í Bónus að kaupa bleyjur, Davíð Ingi horfir á Cars og Jóhanna röltir um og er að brasa heilan helling með hitt og þetta. Já, hún röltir um! Nú er litla snúllan loks farin að labba. Í síðustu viku fór hún í tíma í sjúkraþjálfun og í þeim tíma gerðist eitthvað - hún fann sjálfstraustið og öryggið sem þurfti til að leggja af stað. Það var ekki spurning um getu - hún er búin að labba með litla dúkkuvagna og svoleiðis á undan sér mánuðum saman, og sumt af þessu fislétt. En hana vantaði alltaf öryggið, að hafa eitthvað til að halda í. Ég hef lengi leitt hana um allt, og upp á síðkastið látið hana halda í bara einn putta til að hún þjálfaði frekar ganginn og jafnvægið. Dagmamman hennar, hún yndislega Valla, var alveg rosalega dugleg við að láta hana gera hluti sem þjálfuðu þetta enn meira. Og þegar Jóhanna hætti hjá henni þann 10. júlí kveið mig satt að segja fyrir því að hún myndi enn ekki vera byrjuð að labba almennilega þegar hún byrjar á leikskólanum 17. ágúst. Það var greinilega óþarfi. Nú arkar hún út um allt, líka á grasinu og í gær var hún að æfa sig að labba á mölinni. Með sín slöku liðbönd gengur hún rosalega innan á fætinum, sem sandalarnir hennar sérsmíðuðu leiðrétta þegar hún er í þeim, en þó hún sé í öðrum skóm með mjög góðum stuðningi sést vel hvað hún er laus í fótunum þegar hún labbar t.d. i möl. Þ.a.l. er jafnvægið ekki eins gott og hjá börnum sem ekki hafa svona slök liðbönd. Að einhverju leiti útskýrir þetta af hverju hún byrjar svona seint að ganga, en líka það að hún er svokallaður táfeti, þ.e. vildi alltaf standa á tánum og var með of stutta hásin þar til það var leiðrétt með spelkum.

Annars var ég að setja inn myndir frá júlímánuði inná Facebook, hér er linkurinn á þær:
http://www.facebook.com/album.php?aid=107744&id=657086880&l=87e71c5936

Annars ætti ég að hætta þessu pikki og fara að gera eitthvað með börnunum, en læt þessu bloggi lokið með nokkrum sjóðheitum myndum úr ferð sem við fjölskyldan fórum í Lystigarðinn í morgun.


Feðgin á bekk ásamt dúkkunni hennar Jóhönnu.




Gosbrunnurinn heillaði.


Davíð Ingi badmintonkappi.

Svo tók Davíð Ingi smá syrpu af foreldrum sínum og móður sitjandi á grasinu. Greinilega er hann upprennandi ljósmyndari, þó að fyrsta myndin sé hreyfð og á næstu vanti aðeins ofan á hausana á foreldrunum






Biðjum að heilsa í bili - vona að þið hafið haft gaman af!

Ég var að leika mér á Photobucket og setti þetta saman, vona að þetta virki og þið getið séð þetta.
http://s103.photobucket.com/albums/m148/ingaflakkari/july%2009%20for%20blog/?action=view&current=a85f3e09.pbr

Sælinú! Allt gott að frétta, fríið er skollið á hjá mér og börnin verða brátt komin í frí úr leikskóla og daggæslu. Veðrið leikur við okkur og það er gaman að lifa.

Ég henti inn myndum á Photobucket í júní sem ég ætlaði alltaf að henda hér inn. Nú er loks komið að því, smá myndablogg, og kannski koma fleiri síðar. Ekki er þó hægt að treysta því, enda sjáið þið hvað ég er (ó)dugleg að blogga.

Ferð á leikvöllinn í byrjun júní:


Davíð Ingi hætti að nota hjálpardekk í vor og var fljótur að ná því að hjóla án þeirra. Hér er hann á hjólinu sínu.


Jóhanna fer í rennibraut með hjálp pabba.


Það er gaman að róla.


Davíð Ingi hjólakappi rólar.


Gamla tók sjálfsmynd sem er svosem ekkert sérstök, en mér finnst bakgrunnurinn fínn ;-)

Ég tók þessa mynd alveg óvart, en finnst hún skemmtileg því hún fangar augnablikið á róluvelli í úthverfum Akureyrarbæjar. Verst að það sést í puttann þarna...

Svo eru það nokkrar myndir frá því síðast í sveitinni fyrir þá sem ekki gátu séð þetta á Facebook:
Hér er afi gamli að fíflast í Jóhönnu, eins og er hans vani.


Meira fíflarí og knús líka...


Afi, þú ert bestur!


Að lokum eru hér nöfnurnar þær Selma Jóhanna og Jóhanna litla. Sú yngri var að máta lopahúfuna sem amma í Miklholtshelli gaf henni - nei, hún átti ekki að fara að sofa með hana á sér ;-)

That's it for now, folks. Ég verð að fara að sofa. Langur dagur á morgun - klipping, kannski kíkir einhver í heimsókn til manns, og svo kemur smiður á vegum Álnabæjar til að setja upp gluggatjöld seinni partinn. Alltaf eitthvað að gerast!

Vona svo að ég nenni að skrifa eitthvað meira hér á næstunni. Og hver veit, kannski kemur annað - nýlegra - myndablogg.

Adios!
Ingibjörg

Jæja, þá get ég gengið í tölu lifenda á ný. Prófin eru búin, búin að skila einkunnum, búin að klára endurtektarpróf. Prófatíðin er alltaf góð tilbreyting og öðruvísi taktur þá, en lokaspretturinn var erfiður. Ég vann svo lengi í gærkvöldi við að klára að ganga frá einkunnum og búa til endurtektarpróf að ég er búin á því - og ákvað því að blogga smá áður en prófsýningin hjá mér byrjar á eftir.

Svo er bara eftir að taka til á borðinu, skrifa skýrslur og samantektir (það fylgir því að kenna í MA svo og starfinu verkefnisstjóri erlendra samskipta), fara á nokkra fundi, í enskupartý hjá Andra samkennara mínum, hreinsa hugann fyrir sumarið, and so on. Ég vonast til að geta gengið glöð út í sumarið ekki seinna en 22. júní. Í raun byrjar sumarfrí þann 19. en ég er að fara suður um helgina með fjölskyldunni og tek rúma tvo daga í frí út af því, svo að ég verð að vera eitthvað lengur en flestir hinir í staðinn.

Mikið óskaplega er þetta annars búinn að vera erfiður vetur. Það var gjörsamlega brjálað að gera í vinnunni (eins og alltaf), hér snjóaði endalaust á tímabili og veturinn var kaldur og þjakandi, fréttir um hrunið og efnahagsástandið dundu á manni dag eftir dag (og gera enn - er það ekki nóg til að gera mann þunglyndan?), og mig langaði óvenjulega mikið að vera nær gömlu vinunum og fjölskyldunni. Hér á Akureyri er gott að vera, sérstaklega fyrir barnafólk, en ég fann þó óvenjulega mikið fyrir því í vetur hvað við erum í raun langt frá gömlu vinunum og stórfjölskyldunni - af einhverjum ástæðum. Það sem vegur þyngst er þó að mig langar að geta hitt foreldra mína oftar en áður, vegna breyttra aðstæðna á þeim bænum. Þau koma alls ekki oft til Akureyrar, en til Reykjavíkur fara þau reglulega. En svona er það. Einu sinni bjó ég í Skotlandi og þá var langt að fara heim, nú er þetta þó ekki nema bíltúr í einn dag eða svo .

Nú er sumarið komið og sól í hjarta, og tími til kominn að lappa eitthvað upp á fjölskyldulífið. Ég hitti manninn minn í hádeginu og var það í fyrsta skipti sem við gerum eitthvað ein saman í margar vikur eða jafnvel mánuði! Er vinnan að taka yfir líf mitt eða hvað? Við ætlum svo suður á fimmtudaginn; Davíð Ingi á tíma hjá augnlækni á föstudagsmorgunn og svo aftur á mánudagsmorgunn. Már tók sér frí og við ákváðum að gera þetta að fjölskylduferð, vera í Flóanum hjá tengdó um helgina og hitta jafnvel einhverja ættingja og vini.

Hér við hliðina á mér skrjáfar í blöðum þar sem Andri hamast við að taka til pappíra og próf. Ég fæ samviskubit og ætti að fara að gera eitthvað af viti. Blogga vonandi eitthvað meira bráðlega - nú verður loksins einhver tími til að gera svoleiðis!

Cheerio!

Og nú, gott fólk, eru komnar inn myndir á facebook, tvö stykki albúm. Fyrir þá sem eru ekki vinir mínir á facebook, eða ekki með facebook yfirhöfuð, þá eru slóðirnar eftirfarandi:

Myndir af börnunum, mars til maí:
http://www.facebook.com/album.php?aid=97551&id=657086880&l=ca4df41b0d

Myndir úr sveitaferðinni um síðustu helgi:
http://www.facebook.com/album.php?aid=97553&id=657086880&l=9a2be6effb

Enjoy!

Sælinú!
Jóhanna litla sefur (en vaknar örugglega bráðum) og Davíð Ingi horfir á Aladdín, svo að ég ætla að pikka inn smá fréttir. Már flaug suður í morgun til að halda upp á 20 ára stúdentsafmæli á Laugarvatni í kvöld svo að það erum bara við börnin í kotinu núna.

Síðan síðast hefur ýmislegt gerst. Um síðustu helgi fórum við á Strandirnar og vorum þar í tæpa fjóra daga. Það var yndislegt að komast heim í sveitina, sjá pabba og mömmu, Gulla, Eddu og Júlíönu Lind, auk þess sem Arnar bróðir og fjölskylda voru líka á svæðinu. Ég hugsaði meir að segja næstum ekkert um vinnuna alla helgina! Við fengum gott veður og Davíð Ingi var úti allan daginn, ýmist í fjárhúsunum með afa eða úti að leika með Kristni Halli frænda og Júlíönu frænku. Hann fann sér svo þennan forláta þaraþöngul og festi á hann nælonnet sem hann fann í fjörunni og notaði græjuna til að veiða ímyndaða fiska (steina) niðri í fjöru, í Síkinu eða úti í læk. Þetta gat hann dundað sér við tímunum saman. Jóhanna lék á alls oddi og fannst mjög gaman að sjá kindurnar og litlu lömbin. Hún var jafn ljúf og góð og glöð eins og venjulega og var afar góð við afa og ömmu.

Um helgina var svo Jóhanna að labba á milli okkar og var gífurlega montin af því. Svo var það á mánudaginn þegar við komum heim að hún labbaði bara allt í einu af stað hérna fyrir utan, og labbaði langar leiðir hér úti á gangstétt. Hún var að vísu á sérsmíðuðu fjörutíu og eitthvaðþúsundkróna sandölunum sem hún er mikið stöðugri á heldur en þegar hún er á sokkunum, en vegna þess að hún er með svo laus liðbönd þá eru fæturnir hálfskakkir þegar hún stendur á þeim berfætt eða á sokkum. Hvað um það, þarna úti labbaði hún margar ferðir niður með húsinu og var farin að fara ansi hratt yfir; ég fylgdi henni eftir auðvitað til að passa upp á hana. En á endanum stoppaði hún, hallaði sér fram, og áður en ég náði að grípa hana datt hún beint á ennið, litla greyið, og meiddi sig töluvert og hruflaði, þó ekki væri það neitt alvarlegt. Og þar með var hún hætt að labba og hefur ekki tekið svona syrpu aftur síðan, þó hún hafi gengið mikið á milli okkar Más hérna inni og líka frá mér og að sófanum hinum megin (það er, "nýja" leðurhornsófanum sem við keyptum notaðan um daginn).

Á fimmtudaginn fór Jóhanna svo í röraaðgerð. Þetta var mjög skrítið, því að þó að þetta sé minniháttar aðgerð þá kveið ég mikið fyrir að hún yrði svæfð, og svo þegar hún fékk kæruleysislyfið uppgötvaði ég allt í einu að ég var farin að gráta - tárin láku niður kinnarnar á mér án þess að ég hefði tekið eftir því! Og svo fannst mér erfitt þegar hún fór með hjúkkunum inn í svæfinguna. Þetta var þó mjög fljótt að ganga fyrir sig og gekk vel, en hún vaknaði illa úr svæfingunni og grét þónokkuð lengi og var alveg ómöguleg. Núna er hún hin hressasta og ekki að sjá að hún sé neitt eftir sig. Ég vona svo sannarlega að þetta geri sitt gagn og barnið mitt verði ekki eins mikið veik og fái sjaldnar í eyrun hér eftir - þetta var bara orðin krónísk eyrnabólga, eins og ástandið var þarna í apríl og fram í maí.

En nú er hún Jóhanna að vakna, Davíð Ingi er búinn að glápa alltof lengi, og ég ætla að reyna að skreppa í heimsókn með börnin því ekki er gaman að hanga heima allan daginn þó svo að það sé gott að vera heima - svona oftast.

Ég ætla svo að reyna að skella inn myndum úr sveitaferðinni á næstunni, annaðhvort hérna inn eða á Facebook, sem ég vísa þá í hérna á síðunni.

Bless í bili!
Grasekkjan

Það er kominn háttatími og ég er búin að sitja við í mestallt kvöld og vinna í að skrifa matsblöð fyrir nemendafyririestra, reikna út einkunnir og annað slíkt. Nú er önnin alveg að verða búin og mikið að gera eftir því. Já, bara ein og hálf vika eftir af kennslu og þá tekur hin yndislega prófatíð við. Ég er á lokasprettinum með lúnar axlir og gleraugu á nefinu. Var í vinnunni hálfan daginn í dag og einn þriðja úr gærdeginum, við mikinn fögnuð fjölskyldunnar. Ég hugga mig við það að þetta er að verða búið, og brátt kemur sumarfrí. Þá ætla ég að fara í göngutúra og sund, kíkja á kaffihús, lesa um breskt kóngafólk og henda saman uppkasti að einni grein eða svo.

Undanfarnar vikur eru búnar að vera erfiðar vegna mikilla veikinda hjá Jóhönnu minni. Á einum mánuði fékk hún þrisvar í eyrun, nú síðast ásamt lungnabólgu. Nú er hún að klára þriðja skammtinn af sýklalyfjum á rúmum mánuði. Ég er alveg hissa á því að maginn hennar skuli þola þetta. Á síðustu tveimur vikum var hún þrjá daga af níu vinnudögum hjá dagmömmunni. Þetta er búið að vera púsl en sem betur fer eigum við hana Sillu sem hefur verið mikið með Jóhönnu hér heima svo ég geti kennt og Már sinnt vinnunni (enda nóg komið af fjarverum og slíku í vetur). Ég ætla rétt að vona að litla dúllan verði ekki aftur veik í bráð - og bráðum förum við til háls-nef- og eyrnalæknis og hún fær þá vonandi einhverja betri meðferð við eyrnabólgunum en endalausa lyfjakúra (lesist: rör).

Jóhanna er núna farin að ganga með kerru á undan sér um allt. Enn sleppir hún sér ekki nema í andartak, en í gær var hún mjög dugleg og labbaði nokkur skref á milli okkar pabba síns, nokkrum sinnum - og var voða montin með sig. Fæturnir hennar eru þannig að hún gengur rosalega mikið innan á ilinni, og þarf örugglega mikið að gerast áður en sú skekkja leiðréttist almennilega. Hinsvegar er hún búin að taka það mikið stökk núna undanfarnar vikur, hvað varðar jafnvægi, sjálfstraust og þor, að við erum mjög bjartsýn á að nú fari hún að ganga innan tíðar. A.m.k. er núna hægt að leiða hana um allt hér innandyra með því að halda bara í aðra hendina hennar, eða svona yfirleitt. Hún hefur verið í sjúkraþjálfun í hverri viku sem hjálpar líka mikið. En mikið verð ég fegin þegar litla snúllan mín fer að labba. Bæði vegna hennar sjálfrar og vegna baksins á mér, sem þolir illa að bera tólf-kílóa stelpuna mína um eins mikið og ég þarf yfirleitt að gera.

Ég lýsti því yfir á Facebook í kvöld að ég væri svo glataður bloggari. En þó, hér er allavega eitthvað handa ykkur sem nennið ennþá að líta hér inn endrum og eins.

Until next time.... cheerio!

Hún Jóhanna mín varð 19 mánaða gömul í gær. Greyið er aftur komin með eyrnabólgu í sama eyra og um daginn, en er hress og fór til dagmömmu í dag (var heima í gær). Hún er búin að fá svo oft í eyrun að ég ætla að fara að ræða það við lækninn okkar hvort ekki sé kominn tími á rör.

Hvað um það, tilefni þessa bloggs er dugnaður litlu snúllunnar minnar. Eftir kvöldmatinn í kvöld tók ég af henni bleyjuna og ákvað svona af rælni að prófa að setja hana á koppinn. Henni líkaði vel að sitja þarna og ég spurði hana hvort hún vildi pissa og kúka. "Kúkí" sagði mín aftur og aftur og benti ofan í koppinn, svo leið smástund áður en hún rembdist nokkrum sinnum og voilá! Svo vildi hún bara sitja áfram á koppnum, því að þetta var afar spennandi allt saman, en þegar ég náði henni af var hún einmitt búin að gera það sem ég bað um, allt eftir pöntun...

Nú verður gæsin gripin og litla dúllan vanin á koppinn...

...ég hef verið svo léleg að blogga. Ætlunin var að bæta mig en ég er ósköp löt.

Það er þó helst að frétta að við ætlum að skreppa til hennar tengdamömmu í Flóanum um páskana, leggjum í hann á morgun. Við ætluðum að fara á Strandirnar en það spáir bara svoddan leiðinda veðri og vegurinn er sjálfsagt að lokast aftur þó hann hafi verið opnaður í gær -eða mér skilst allavega af fréttum á Facebook og annarsstaðar að það hlaði niður á Veiðileysuhálsinn...

Annars er allt í besta hérna. Jóhanna tekur framförum, labbar með og þjálfast í jafnvægi með hverjum deginum, henni gengur vel í sjúkraþjálfuninni sem hjálpar mikið. Núna bætast við orð hjá henni á hverjum degi, það er alltaf eitthvað nýtt að koma og nú síðast í dag fór hún allt í einu að segja Davíð með "d" í byrjun (hefur alltaf sagt "aí.." en nú var það "dawí"). Svo spjallar hún heil ósköp um eitthvað og maður veit ekkert hvað hún er að segja, en hún er samt greinilega að reyna að segja eitthvað mikið og merkilegt. Davíð Ingi er svo kominn á það skeið að taka syrpur í því að spyrja um hitt og þetta. Um daginn keyrðum við að sækja systur hans til dagmömmunnar og hann spurði alla leiðina: "hver bjó til fólkið?" - "hver bjó til húsin?" - "hver bjó til trén?" - "hver bjó til grasið?" - "hver bjó til steinana?" og svo framvegis. Svo spyr hann mjög oft um hin og þessi orð, hvað þau þýða; alveg bullandi málþroski í gangi...

Ég skellti mér á bókamarkað og keypti helling af barnabókum á góðu verði og eina bók handa mér: Matreiðslubók Nönnu - á sexþúsund kall. Í henni eru hvorki meira né minna en 23 uppskriftir að hakkréttum og 26 uppskriftir að kjötbollum og buffi, svo eitthvað sé nefnt. Held þetta sé bara algerlega nauðsynleg bók á hvert heimili, og svo sagði ég manninum mínum (sem er ekki mikið í því að elda) að ég hefði keypt hana sérstaklega fyrir hann .

Ég sjálf er búin að sökkva mér í sögur af bresku kóngafólki á 16. og 17. öld. Nú er ég komin með hugmynd að rannsóknarverkefni sem ég vona að ég finni einhvern tíma til að vinna í. Kennslan er nefnilega ansi tímafrek sem áður, en miðað við síðustu önn (haustönn) þá er ég í slökun núna (en samt fara mörg kvöld í vinnuna og hluti af hverri helgi). Segið svo ekki að það sé labb í almenningsgarði (enska: walk in the park) að vera kennari. Að vísu bíðum við núna spennt eftir fregnum af því hvernig nákvæmlega niðurskurði verður hagað á næsta skólaári... jamm, við erum líka að fara undir hnífinn og það er a.m.k. búið að gefa það út að nú fái enginn yfirvinnu, og svo heyrir maður hvíslað um frekari aðgerðir til sparnaðar... Kannski manni gefist meiri tími fyrir grúsk af akkúrat þessum ástæðum?

En don't get me started on the kreppa... Ég verð alltaf jafn reið þegar ég fer að hugsa um ástandið eða lesa pistla og blogg sem fjalla um efnahagsmál þjóðarinnar og annað því skylt. Og það versta er að mér finnst stjórnvöld ekki vera að gera nóg fyrir heimilin í landinu. Greiðslujöfnun hvað? Af hverju má enginn heyra á það minnst að frysta verðbólguna eða gera eitthvað róttækt varðandi verðtrygginguna? Lífeyrissjóðir og sparifjáreigendur tapa - en hvað um hinn almenna borgara? Ég sver það, og ég er aðdáandi Jóhönnu Sig, og finnst oft vera fútt í Steingrími Joð, ég veit ekki hvað ég á að kjósa þann 25. apríl þó ég viti eitt: Sjálfstæðisflokkurinn má ekki komast í næstu ríkisstjórn!!  Hér kom bleðill í fyrradag með stefnumálum Vinstri Grænna... af hverju finn ég hann ekki, ég ætlaði að vitna beint í hann! Sennilega hefur hann farið í ruslið því ég var svo bit yfir þessari froðu- eitthvað um að skoða aðgerðir varðandi verðtryggð lán og bleh bleh. SKOÐA!! Eitt orð kom upp í hugann: "lame." Og ég er nokkuð viss um að Vinstri Grænir eru ekki einir um að fara þannig í kringum kjarna málsins.

En ekki meir um pólitík. Ég ætla að fara að skutla einhverjum fataleppum í ferðatöskur. Loksins bloggaði ég - og fór út um víðan völl!

Vonandi hafið þið það gott elskurnar mínar. Until next time...

Mikið er nú gaman að sitja í tíma þar sem nemendur eru niðursokknir í málfræðiæfingar og ró er yfir kennslustofunni.

Nemendur eru fallegt fólk, og lífga upp á mann sjálfan. Þó að kennarastarfið sé ansi streitukennt á stundum er gott að vinna með ungu fólki. Það veitir manni nýja og ferska sýn á hlutina. Ég vona allavega að það hjálpi við að halda mér ungri í anda...

... er í tækinu, ég er búin að sitja hér síðasta rúma klukkutímann og hlusta á tónlist á meðan fjölskylda mín sefur, það er svo notalegt að eiga stund með sjálfum sér (og tölvunni). Þetta er búinn að vera fínn dagur, það er blíða á Akureyri, í morgun fórum við út með krakkana og seinni partinn skruppum við á kaffihús. Það var traffík á Bláu Könnunni en þar fengum við okkur hressingu, Jóhönnu leist ekki á allt þetta fólk til að byrja með. Már eldaði svo kvölmatinn, sem er frekar sjaldgæft en kærkomin tilbreyting, á meðan dundaði ég mér við að ganga frá þvotti og leika við Jóhönnu, en Davíð Ingi horfði á Skoppu og Skrítlu. Eftir góðan og hressandi göngutúr að loknum kvöldverkum, háttatíma og lestri fyrir börnin var gott að gera æfingar á teppi fyrir mitt viðkvæma bak, brjósklosið blundar þarna enn og ég verð að passa mig að styrkja bakvöðvana og hreyfa mig reglulega.

Afmæli á morgun og vissara að koma sér í svefn... Mig langar samt að sitja áfram og hlusta á Sálina og Gospel. Skemmtilegur diskur sem ég keypti á tilboði í Bónus í vikunni.

Lífið er gott...